અઢી અક્ષરની દોસ્તી, ને બે અક્ષરના અમે;
ખોટ પડી અડધા અક્ષરની, પૂરી કરજો.. તમે !
ત્રણ અક્ષરના આકાશે આ બે અક્ષરની વીજ,
ત્રણ અક્ષરનો સૂરજ રચતો પાંચ અક્ષરની ચીજ.
ચાર અક્ષરની ‘ઝરમર’ ઝીલતાં રૂંવાડાં સમસમે,
ખોટ પડી અડધા અક્ષરની, પૂરી કરજો.. તમે !
ચાર અક્ષરના ‘ધોધમાર’માં છલછલ આપણાં ફળિયાં;
આંખમાં આવ્યાં પાંચ અક્ષરનાં ગળાબૂડ ઝળઝળિયાં
ત્રણ અક્ષરનું કાળજું કહો ને, ઘાવ કેટલા ખમે ?
ખોટ પડી અડધા અક્ષરની, પૂરી કરજો.. તમે !
પાંચ અક્ષરનો મેઘાડંબર, બે અક્ષરનો મેહ,
અઢી અક્ષરના ભાગ્યમાં લખિયો અઢી અક્ષરનો વ્રેહ !
તાળો અડધા અક્ષરનો, જો મળે તો સઘળુ ગમે,
ખોટ પડી અડધા અક્ષરની, પૂરી કરજો.. તમે !
No comments:
Post a Comment