શ્યામ રંગ સમીપે ન જાવું...-દયારામ

શ્યામ   રંગ  સમીપે   ન  જાવું
મારે આજ થકી શ્યામ રંગ સમીપે ન જાવું
જેમાં કાળાશ તે તો સૌ એકસરખું
સર્વમાં    કપટ    હશે     આવું
કસ્તૂરી  કેરી  બિંદી તો  કરું નહીં
કાજળ    ના   આંખમાં   અંજાવું
મારે આજ થકી શ્યામ રંગ સમીપે ન જાવું

કોકિલાનો શબ્દ હું સૂણું નહીં કાને
કાગવાણી   શકુનમાં   ન   લાવું
નીલાંબર  કાળી  કંચૂકી ન પહેરું
જમનાનાં    નીરમાં   ન   ન્હાવું
મારે આજ થકી શ્યામ રંગ સમીપે ન જાવું

મરકતમણિ  ને  મેઘ દ્રષ્ટે  ના જોવા
જાંબુ     વંત્યાક      ના       ખાવું
દયાના પ્રીતમ સાથે મુખે નીમ લીધો
મન કહે  જે   પલક    ના   નિભાવું
મારે આજ થકી શ્યામ રંગ સમીપે ન જાવું
-દયારામ